Connect with us
Advertisement
Advertisement

Cymraeg

Ffordd newydd o weithio gyda’r Sector Cyhoeddus

Published

on

GWNAETHPWYD camau breision ymlaen yn y ffordd o gyd-weithio gyda’r sector cyhoeddus wrth i Brifysgol Cymru Y Drindod Dewi Sant arwyddo cytundebau gyda thri awdurdod lleol yn y rhanbarth.

Bwriad y cytundebau– gyda Chynghorau Sir Ceredigion a Chaerfyrddin, a Chyngor Dinas a Sir Abertawe – yw gwneud gwahaniaeth i fywyd pobl sy’n byw, gweithio ac ymweld â De Orllewin Cymru ac maent yn arwydd o ymrwymiad Grŵp Prifysgol Cymru Y Drindod Dewi Sant, sy’n cynnwys Coleg Sir Gâr and Coleg Ceredigion, i gyfnerthu’r berthynas waith yn y siroedd lle y lleolir ei phrif gampysau. Mae’r Brifysgol yn awyddus i wneud mwyaf o’I heffaith ar y rhanbarth drwy sianelu talentau a sgiliau staff, myfyrwyr a graddedigion i gyflawni ar y meysydd blaenoriaeth allweddol ar gyfer pob un o’r sefydliadau.

“Mae adduned y Brifysgol i bob un o’r awdurdodau lleol y mae ei champysau wedi eu lleoli ynddynt yn dangos ffordd newydd o gydweithio er budd y rhanbarth,” meddai’r Hybarch Randolph Thomas, Cadeirydd PCYDDS. “Rydym wedi ymrwymo i’r cymunedau hynny ac am sicrhau bod PCYDDS yn cyfrannu at eu lles drwy ddefnyddio ein hadnoddau a’n doniau i wasanaethu lles y cyhoedd”.

Mae’r addewidion yn eu hanfod yn ddatganiadau o fwriad i gydweithio i gyflawni nodau a fydd yn elwa pawb mewn meysydd o ddiddordeb cyffredin, gan gynnwys ymrwymiadau i ddatblygu cynaliadwy; strategaethau gwrth-dlodi, datblygu economaidd, menter, arloesi ac adfywio, a datblygu cymunedol. Mae’r addewidion hefyd yn canolbwyntio ar uchafu potensial y rhanbarth ar gyfer gweithgareddau chwaraeon a diwylliannol ac yn dathlu ei hanes a’i threftadaeth unigryw drwy fanteisio ar ei photensial twristiaeth.

Bydd PCYDDS yn cydweithio mewn partneriaeth â Chyngor Sir Ceredigion i ddatblygu ymatebion arloesol i anghenion iechyd a gofal cymdeithasol mewn ardaloedd gwledig ac ar ddarparu gweithgareddau ymgyfoethogi ar gyfer dysgwyr ôl- 16 yng Ngheredigion. Dywedodd y Cynghorydd Ellen ap Gwynn, arweinydd Cyngor Sir Ceredigion “Rydym wrth ein bodd yn cael y cyfle i gydweithio’n agos â Phrifysgol Cymru Y Drindod Dewi Sant. Credwn yn gryf y bydd y berthynas newydd hon sy’n cael ei meithrin rhwng ein sefydliadau trwy ymrwymo i’r Adduned a fydd o fudd mawr i boblogaeth Ceredigion.”

Bydd y gwaith gyda Cheredigion a Chyngor Sir Gaerfyrddin yn cynnwys uchafu enw da’r rhanbarth fel canolfan rhagoriaeth ar gyfer y gadwyn gyflenwi bwyd drwy feithrin partneriaethau gyda chynhyrchwyr a chyflenwyr. Bydd nodau gweithredu penodol gyda Chyngor Sir Caerfyrddin yn ymwneud â chefnogi adleoliad pencadlys S4C i Sir Gaerfyrddin ac ar ddatblygiad o ran yr iaith a’r diwylliant drwy Ganolfan Gymraeg newydd y Brifysgol yng Nghaerfyrddin.

Dywedodd y Cynghorydd Kevin Madge, Arweinydd Cyngor Sir Caerfyrddin : “Rydym yn falch iawn o lofnodi’r adduned hon gyda Phrifysgol Cymru Y Drindod Dewi Sant yn elwa rhychwant o gymunedau yn Sir Gaerfyrddin.”

Ychwanegodd yr Athro Medwin Hughes, Is-Ganghellor Prifysgol Cymru y Drindod Dewi Sant: “Mae’r adduned yn adlewyrchu nifer o feysydd allweddol sy’n flaenoriaethau i’r Cyngor ac i’r Brifysgol ac mae’n anelu at wneud gwahaniaeth gwirioneddol i fywydau pobl sy’n byw, gweithio ac yn ymweld â’r ardal. Rydym am fanteisio ar y cyfoeth o brofiad ac arbenigedd sydd o fewn y Brifysgol er mwyn ysgogi twf economaidd yn y rhanbarth ac i archwilio cyfleoedd newydd sy’n gysylltiedig ag addysg a hyfforddiant, yn ogystal â hamdden a thwristiaeth”.

Continue Reading
Advertisement
Click to comment

Leave a Reply

Your email address will not be published. Required fields are marked *

Cymraeg

Rhybudd i beidio â gwaredu sbwriel mewn safleoedd ailgylchu

Published

on

Does dim esgus dros dipio anghyfreithlon unrhyw le yn Sir Gaerfyrddin – dyna’r neges wrth i bobl gael eu rhybuddio i beidio â gwaredu eu sbwriel mewn safleoedd ailgylchu cymunedol neu gallant wynebu dirwy.

Mae gadael unrhyw fagiau neu eitemau eraill ar y llawr mewn safleoedd ailgylchu yn cael ei ystyried yn dipio anghyfreithlon ac os caiff preswylwyr eu dal yn gwaredu eu gwastraff, gallant gael dirwy ddiderfyn a/neu hyd at bum mlynedd yn y carchar.

Mae swyddogion y Cyngor yn monitro safleoedd ailgylchu ledled y sir yn barhaus. O ganlyniad, maent wedi rhoi 24 o hysbysiadau cosb benodedig yn amrywio o £75 i £350 ers dechrau’r flwyddyn i bobl sy’n gadael eu gwastraff yn anghyfreithlon ar y safleoedd.

Mae eitemau sy’n cael eu gwaredu yn amrywio o nwyddau trydanol i fagiau du.

Drwy gydol yr argyfwng Coronafeirws, parhaodd casgliadau gwastraff ac ailgylchu o dŷ i dŷ ynghyd â’r gwasanaeth casglu gwastraff swmpus y telir amdano ar gyfer hyd at dair eitem fwy.

Ailagorwyd Canolfannau Ailgylchu Gwastraff y Cartref o 26 Mai gyda system apwyntiad yn unig. Mae apwyntiadau ar gael yn rhwydd a gall preswylwyr fynd i’r canolfannau bob saith diwrnod i gael gwared ar wastraff domestig os bydd angen.

Dywedodd y Cynghorydd Philip Hughes, Aelod o Fwrdd Gweithredol y Cyngor dros Ddiogelu’r Cyhoedd: “Mae cyfrifoldeb ar bob un ohonom i ofalu am ein sir. Rydym yn deall bod ein cymunedau, fel ninnau, yn grac ac yn teimlo’n rhwystredig oherwydd tipio anghyfreithlon, a byddwn bob amser yn ceisio dod o hyd i’r rhai sy’n gyfrifol. Mae tipio anghyfreithlon nid yn unig yn edrych yn salw ond mae’n denu fermin i’r ardal.

“Rydym yn deall bod canolfannau ailgylchu gwastraff y cartref wedi bod ar gau dros dro yn ystod COVID, fodd bynnag, nid yw hynny’n esgusodi’r math hwn o ymddygiad anghyfreithlon ac mae’r canolfannau wrth gwrs ar agor erbyn hyn felly does dim esgusodion.

“Efallai nad yw rhai preswylwyr yn ymwybodol eu bod yn tipio’n anghyfreithlon, ond os gadewir bagiau neu eitemau wrth ochr biniau, waeth a ydynt wedi mynd â’r eitemau i safle ailgylchu cymunedol, mae’n dal i fod yn dipio anghyfreithlon.

“Mae llawer o bobl wedi cael eu dal yn gwaredu sbwriel ac wedi wynebu dirwy o ganlyniad i hynny ac mae swyddogion yn parhau i fonitro’r safleoedd hyn ledled y sir. Gwaredwch eich gwastraff yn gyfrifol a rhowch wybod i ni am unrhyw achosion o dipio anghyfreithlon y byddwch yn dod ar eu traws er mwyn i ni allu ymchwilio i’r achos.”

I drefnu apwyntiad yn un o bedair canolfan ailgylchu’r sir ewch i www.sirgar.llyw.cymru/cartref/gwasanaethaur-cyngor/ailgylchu-biniau-a-sbwriel/canolfannau-ailgylchu/

I roi gwybod am dipio anghyfreithlon ewch i www.sirgar.llyw.cymru/cartref/gwasanaethaur-cyngor/ailgylchu-biniau-a-sbwriel/sbwriel/tipio-anghyfreithlon/

Continue Reading

Cymraeg

Sêr Seland Newydd wedi gosod y safon

Published

on

WRTH i gystadleuaeth Super Rugby Aotearoa gyrraedd ei ddiweddglo, mae sylwebydd Clwb Rygbi, Gareth Charles, yn credu fod timau Seland Newydd wedi gosod safon rhyfeddol i weddill y byd rygbi i’w ddilyn.

Ar benwythnos olaf y gystadleuaeth rhwng pum tîm proffesiynol y wlad, bydd y Blues a’r Crusaders, yn mynd benben â’i gilydd yn Eden Park, tra bod Highlanders yn croesawu’r Hurricanes i Stadiwm Forsyth Barr yn Dunedin. Bydd uchafbwyntiau o’r ddwy gêm i’w gweld ar Clwb Rygbi, am 9.00 ar nos Sul 16 Awst, ar S4C.

Dywedodd Gareth, sydd yn rhan o’r tîm sylwebu ar gyfer y rhaglen: “Mae e wedi bod yn ffantastig i’r gwylwyr sydd wedi bod heb rygbi ers shwt gymaint. O’r cychwyn cyntaf, mae drama wedi bod ym mhob gêm. Doeddwn i ddim cweit yn disgwyl iddo fod mor dda, ond yn bendant mae’r safon wedi bod yn aruthrol.

“Mae pob tîm wedi dangos awydd i chwarae rygbi positif a dydyn nhw ddim wedi chwarae’n geidwadol. Trafod y bêl sydd wedi bod yn bennaf yn eu meddwl nhw, ac mae hynny bendant yn rhywbeth allwn ni edrych arno wrth i’r gêm ddychwelyd i hemisffer y gogledd.

“Y Blues a’r Crusaders yw’r ddau dîm gorau sydd wedi bod yn y gystadleuaeth. Maen nhw’n gallu chwarae rygbi ym mhob ffordd. Maen nhw’n chwarae gêm sy’n seiliedig ar sgiliau, ond mae’r elfennau gosod, fel cael sgrym cryf, yno hefyd. Mae’n ddiweddglo addas iawn i’r gystadleuaeth.”

Tro chwaraewyr Cymru fydd hi i ddychwelyd i’r maes yr wythnos ganlynol, wrth i’r Guinness PRO14 ail-gychwyn. Gyda dau rownd o gemau darbi yn weddill o’r tymor, bydd Scarlets yn herio Gleision Caerdydd ar ddydd Sadwrn 22 Awst, tra bod y Gweilch a’r Dreigiau yn cwrdd yn y Stadiwm Liberty ar ddydd Sul 23 Awst. Bydd modd gwylio pob un o gemau darbi rhanbarthau Cymru yn eu cyfanrwydd, yr un diwrnod, ar S4C.

Ychwanega Gareth: “Roedd Rhys Patchell yn sylwebu gyda fi ar Super Rugby Aotearoa yn ddiweddar, ac mi oedd e’n dweud, yr unig beth nawr yw fod pobl yn gyfarwydd efo’r rygbi yn Seland Newydd ac maen nhw’n mynd i ddisgwyl timau Cymru fynd syth lan i’r safon yna! Yn amlwg, fydden nhw ychydig yn rhydlyd ar ôl cyfnod mor hir heb rygbi.

“Beth sy’n gyffrous am y gemau yma yw bod lot o wynebau newydd yn y rhanbarthau, ac mae’r seibiant wedi rhoi cyfle i sawl chwaraewr wella o anafiadau, felly mae’r carfanau yn llawn chwaraewyr rhyngwladol. Wrth gwrs, rydw i’n edrych ymlaen at gael rygbi yn ôl yma yng Nghymru ac mae’n grêt i ddechrau nôl gyda gemau darbi.”

Continue Reading

Cymraeg

Dogfen DRYCH ar restr fer Gwobrau Grierson 2020

Published

on

MAE S4C a Chwmni Da yn falch o gyhoeddi bod dogfen Eirlys, Dementia a Tim ar restr fer Gwobrau Grierson 2020.
Y Gwobrau Grierson, sydd hefyd yn cael ei hadnabod fel The British Documentary Awards, yw digwyddiad mwyaf yng nghalendr dogfennau yn y DU. Mae’r gwobrau yn adnabod ac yn dathlu dogfennau sy’n profi safon, creadigrwydd, gwreiddioldeb a rhagoriaeth.
Mae’r ddogfen, a gafodd ei chynhyrchu gan Gwmni Da ar gyfer cyfres DRYCH S4C – cyfres o ddogfennau gafaelgar sy’n adlewyrchu bywyd yng Nghymru heddiw – wedi ei henwebu yng nghategori ‘Dogfen Sengl Orau – Cartref’.
Mae Eirlys, Dementia a Tim, rhaglen a gafodd ei ddarlledu’n wreiddiol ym mis Ionawr 2020, yn adrodd stori dau hen ffrind sy’n cwrdd unwaith eto ar ôl dilyn llwybrau go wahanol yn eu bywyd. Mae’r ddogfen yn rhoi portread gwahanol i’r arfer o berson sy’n byw gyda Alzheimer’s ac yn dosbarthu neges bwerus gan Eirlys, i beidio bod ofn.
Meddai’r Cynhyrchydd, Sion Aaron: “Rwy’n hynod o falch bod ein dogfen wedi cael ei henwebu. Mae gan Tim Lynn ac Eirlys Smith stori arbennig iawn i’w ddweud, sy’n wefreiddiol ac ar brydiau yn ddigrif. Mae dementia yn cyffwrdd gymaint o fywydau ac rydym ni wedi trio ein gorau i bortreadu’r realiti sy’n wynebu pobl fel Eirlys sy’n byw gydag Alzheimer’s cynnar.”
Meddai Dylan Huws, Uwch Gynhyrchydd y rhaglen: “Mae’r Gwobrau Grierson yn wobrau mawreddog ac mae hi’n fraint bod ymysg yr enwau mawr ar y rhestr. Mae hyn yn dangos ein bod ni’n gallu cynhyrchu straeon heriol ac atyniadol yn y Gymraeg sy’n sefyll ymysg y gorau yn y byd.”
Meddai Llinos Wynne, Comisiynydd Ffeithiol S4C: “Weithiau, mae ‘na gomisiwn sy’n wirioneddol yn cyffwrdd y galon. Mae Eirlys, Dementia a Tim yn enghraifft wych o hynny. Dyma raglen ddogfen a lwyddodd i roi portread gwahanol i’r arfer o berson sy’n byw gydag Alzheimers gan gyfleu neges bwerus a phositif i beidio bod ofn. Dwi’n hynod falch fod y ffilm hon wedi ei henwebu ac yn cael ei gweld ochr yn ochr gyda dogfennau mwyaf pwerus y DU. Llongyfarchiadau mawr i’r tîm i gyd.”
Gyda holl ddarlledwyr y DU yn gallu cystadlu, Eirlys, Dementia a Tim yw unig gynrychiolydd Cymru yng Ngwobrau Grierson.
Mi fydd y noson wobrwyo ar y 10fed o Dachwedd 2020 yng Nghanolfan Southbank, Llundain.

Continue Reading

Trending

FOLLOW US ON FACEBOOK